Sri Chinmoy Marathon Team articles

Eitt met féll í Self-Transcendence 2 mílna Tjarnarhlaupinu 10. maí, en lengi er búið að bíða eftir því

English            Fleiri myndir    More photos Góð þáttaka var í Self-Transcendence 2 mílna Tjarnarhlaupi þriðjudaginn 10. maí.  Fimm hlauparar tóku þátt og jöfnuðu þar með ársmet í þátttöku sem sett var 1. mars og jafnað 8. mars. En þátttökumetið var ekki eina metið sem féll, því Rúnar Páll sló persónulegt met sitt frá 30. nóvember á síðasta ári.  Rúnar hljóp nú á 13:18, en hafði áður hlaupið best 13:34 þann 30. nóv. eins og áður var sagt.  Rúnar var vel að þessu nýja meti kominn, en hann er búinn að vera nálægt því undanfarnar tvær vikur; í síðustu viku var hann 3 sekúndum frá því og í þarsíðustu viku jafnaði hann metið.  Rúnar sannaði þar með hið fornkveðna að "þolinmæði þrautir vinnur allar", en þetta er einmitt eitt af lykilatriðunum í hlaupaheimspeki Sri Chinmoys.  Til hamingju, Rúnar!  Lesið umfjöllun um met Rúnars. Annar hlaupari sem sló met er Ganagane, en hann bætti ársmet sitt frá 25. janúar um rúmlega tvær mínútur!  Hann á þó enn tæpar 2 mínútur í allra besta tíma sinn, 16:21, sem kom 21. september. Ágúst Örn og Víðir gerðu einnig harða hríð að persónulegum metum og voru hársbreidd frá því að ná markmiðum sínum.  Ágúst var 4 sekúndum frá persónulegu meti sínu, 14:09, sem hann setti 26. apríl og Víðir var 2 sekúndum frá ársmeti sínu, 16:07, sem hann setti 8. mars. Aðrir hlauparar áttu rólegan dag og kenndu æfingaleysis, en það stendur vonandi til bóta. Úrslit (millitími eftir 1 mílu innan sviga): Rúnar Páll 13:18 (6:20) Ágúst Örn 14:13 (6:53) Víðir 16:09 (7:50) Ganagane 18:02 (8:36) Upajukta 19:38 (9:23)

Þrír tóku þátt í Self-Transcendence 2 mílna Tjarnarhlaupi í ágætis veðri þriðjudag 3. maí

English Fleiri myndir More photos Það var ekki veðrinu um að kenna að þeim þremur hlaupurum, sem þátt tóku í Self-Transcendence 2 mílna Tjarnarhlaupi þriðjudaginn 3. maí, skyldi ekki takast að setja nein met.  Veður var í sjálfu sér ágætt. Hitt er annað mál að það var engu líkara en nokkurrar þreytu gætti hjá þessum þremur drengjum sem hlupu að þessu sinni, enda hafa þeir stundað stífar æfingar upp á síðkastið og tekið þátt í flestum Tjarnarhlaupum í ár.  Það er að minnsta kosti líklegasta skýringin sem fréttaritari getur fundið á því að ekkert met skuli hafa verið sett að þessu sinni, því annars fellur eitthvað met í nánast hverju einasta hlaupi. Rúnar Páll var fyrstur í mark - og hann var einnig næst því að slá eigið met.  Rúnar kom í mark á tímanum 13:37 sem er aðeins þremur sekúndum frá meti hans, en þetta met setti hann 30. nóvember og jafnaði í síðustu viku.  Í raun er alveg grátlegt hvað Rúnar er búinn að vera nálægt metbætingu síðustu tvö skiptin.  Rúnar hyggst þó taka mið af boðskap Sri Chinmoys og gefast ekki upp.  Hann ætlar sér að slá metið í næsta hlaupi og þá ætlar hann að passa sig á að fá sér ekki að borða stuttu fyrir hlaup. Ágúst Örn kom næstur á 15:20, sem er töluvert frá hans besta, 14:09, sem kom í síðustu viku.  Ágúst hefur æft stíft upp á síðkastið og virkaði þreyttur. Víðir kom síðastur á 16:40.  Víðir hefur enn ekki náð að gera almennilega atlögu að sínum allra besta tíma, 15:52, sem kom 12. október, og auk þess stendur enn met hans fyrir þetta ár, 16:07, en sá tími kom í hlaupinu 8. mars.  Það er vonandi að Víðir finni kraftinn til að bæta sig. Úrslit: Rúnar Páll 13:37 Ágúst Örn 15:20 Víðir 16:40 Gjörið svo vel og skoðið fleiri myndir hér

Aðeins einn tók þátt í Self-Transcendence 2 mílna Tjarnarhlaupinu þriðjudaginn 5. apríl

English Fleiri myndir hér More pictures here Það var napurt og hráslagalegt við Tjörnina í Reykjavík þriðjudaginn 5. apríl, en þá fór fram Self-Transcendence 2 mílna Tjarnarhlaupið. Enda fór svo að aðeins einn hlaupari tók þátt, Ágúst Örn, en hann hefur verið mjög duglegur upp á síðkastið og hefur tekið þátt í sex af síðustu sjö hlaupum. Vinur Ágústs og hlaupafélagi, hinn eini sanni Rúnar Páll, var reyndar einnig á staðnum, en hann var löglega afsakaður frá hlaupaiðkun að þessu sinni, þar sem hann hafði látið draga úr sér endajaxla fyrr um daginn.  Rúnar var því bara þeim mun duglegri við að gefa öndunum. Ágúst náði, skiljanlega, ekki góðum tíma við þessar aðstæður, en hann hljóp á 15:42, sem er 1 mínútu og 24 sekúndum frá hans besta. Hinsvegar er það aldrei til einskis að hlaupa í Self-Transcendence 2 mílna Tjarnarhlaupinu.  Það eitt að heilsa upp á starfsmenn og áhorfendur hlaupsins gerir upplifunina þess virði og svo má benda á að ýmsir hlaupaspekingar, þar á meðal Sri Chinmoy, hafa bent á að það er góð æfing að hlaupa við erfiðar aðstæður. Úrslit (millitími eftir 1 mílu innan sviga): Ágúst Örn 15:42 (7:36) Gjörið svo vel og skoðið fleiri myndir hér

Eitt persónulegt met og eitt ársmet var slegið í Self-Transcendence 2 mílna Tjarnarhlaupi, 29. mars

English Skoðið fleiri myndir hér View more photos here Það rigndi nokkuð en annars var veðrið gott fyrir hlauparana tvo sem tóku þátt í Self-Transcendence 2 mílna Tjarnarhlaupinu þriðjudaginn 29. mars síðastliðinn. Enda lét árangurinn ekki á sér standa: Rúnar Páll kom fyrri í mark á tímanum 13:48.  Þetta var fyrsta hlaup Rúnars síðan 1. febrúar og hljóp hann á besta tíma sínum í ár, en fyrr átti hann best 14:09, sem kom 25. janúar. Þetta verður að teljast góð innkoma hjá Rúnari.  Vinnu sinnar vegna hefur hann verið fjarverandi í tæpa tvo mánuði, en tími hans í þessu fyrsta hlaupi eftir hlé er aðeins 14 sekúndum frá allra besta tíma hans, 13:34, sem kom 30. nóvember.  Rúnar verður því að teljast til alls líklegur í næstu hlaupum. Ágúst gerði hins vegar gott betur en Rúnar, þó hann kæmi á hæla honum í mark, því Ágúst setti nýtt persónulegt met, 14:18.  Tími Ágústs er þriggja sekúndna bæting á fyrra meti, 14:21, sem kom 15. mars, og hefur Ágúst nú þríbætt persónulegt met sitt í marsmánuði, en þessar framfarir hófust í hlaupinu 1. mars er Ágúst hljóp á 14:24 og bætti met sitt frá 7. september um 14 sekúndur. Segja má að Ágúst sýni nú viðlíka framfarir og Rúnar Páll sem fjórbætti persónulegt met sitt á tímabilinu 12. október-30. nóvember í fyrra.  Reyndar voru framfarir Rúnars stórstökkari í sekúndum talið, en framfarir beggja eiga það þó alla veganna sameiginlegt að vera sprottnar úr hinum hvetjandi orðum Sri Chinmoys um stöðugar eigin framfarir (self-transcendence). Úrslit: Rúnar Páll 13:48 Ágúst 14:18 Gjörið svo vel og skoðið fleiri myndir hér

Tveir tóku þátt í Self-Transcendence 2 mílna Tjarnarhlaupi þriðjudaginn 22. mars.

Tveir tóku þátt í Self-Transcendence 2 mílna Tjarnarhlaupi þriðjudaginn 15. mars og settu báðir nýtt persónulegt met

English Fleiri myndir hér More pictures here Það er engu líkara en að Self-Transcendence 2 mílna Tjarnarhlaupið sé orðið að klúbbi fyrir einungis þá hlaupara í Sri Chinmoy maraþonliðinu sem setja ný persónuleg met.  Í síðustu viku settu þrír af fimm hlaupurum persónulegt met og nú, þriðjudaginn 15. mars, settu báðir hlaupararnir nýtt persónulegt met. Andrés varð fyrri til að koma í mark og var það á tímanum 11:24.  Þetta er langbesti tími Andrésar í ár, en fyrra ársmet hans var 12:01 sem hann setti í síðustu viku.  Tími hans nú er aukinheldur aðeins 4 sekúndum frá hans allra besta tíma, sem kom 14. september, og nákvæmlega 42 sekúndum frá Tjarnarhlaupsmetinu, 10:42,  sem Snatak setti 14. ágúst (Um það hlaup eru reyndar ekki til rafræn gögn).  Það er spá fréttaritara að með hækkandi sól muni Andrés ekki einasta setja nýtt persónulegt met, heldur gera harða atlögu að Tjarnarhlaupsmetinu.  Verður spennandi að fylgjast með hvernig þeirri rimmu lyktar. Það er nokkuð fyndið til þess að hugsa að Ágúst kom síðastur í mark og það á sínum besta tíma frá upphafi, 14:21!  Segir þetta nokkuð um það hvað samkeppnin er orðin hörð og frammistaðan góð í Tjarnarhlaupunum.  Ágúst bætti hér sitt fyrra persónulega met um 3 sekúndur og fékk það met aðeins að lifa í 2 vikur, eða síðan 1. mars. Það verður því spennandi að fylgjast með þessum tveimur hlaupurum og öllum hinum sem hafa verið að bæta sig undanfarið í komandi hlaupum. Úrslit (millitími eftir 1 mílu innan sviga): Andrés 11:24 (5:34) Ágúst 14:21 (6:57) Gjörið svo vel og skoðið fleiri myndir hér

Fjórir skokka Self-Transcendence skemmtiskokk á sunnudegi 13. mars þrátt fyrir leiðindaveður og aðra tálma

English

Fleiri myndir hér
More pictures here

Það var svo sannarlega ekki skemmtilegt veðrið sem tók á móti skokkurunum í Sri Chinmoy maraþonliðinu er þeir lögðu upp í sitt vikulega Self-Transcendence skemmtiskokk á sunnudegi 13. mars síðastliðinn.

Veðrinu er best lýst sem svo að það hafi verið sannkallað gluggaveður - sólin skein og úti var fallegt, en á sama tíma var hitastig vel undir frostmarki auk þess sem Kári lét að sér kveða.

En þeir fjórir hlauparar sem tóku þátt létu það ekki á sig fá, þau Ágúst, Pujarini, Suballabha og Viktoría.  Suballabha var þó sýnu verr settur en hin, því hann hafði ekki tíma til að skipta í almennileg hlaupaföt - hvað þá hlaupaskó.  Hann lét sig þó hafa það að vera með, enda alltaf hressilegt að skokka í Laugardalnum í góðra vina hópi.

Sem fyrr var fréttaritari þessarar síðu með myndavélina á lofti og tók nokkrar myndir af umhverfinu sem hægt er að sjá hér.

 

Þrjú met voru slegin og eitt var jafnað á Self-Transcendence 2 mílna Tjarnarhlaupi þriðjudaginn 8. mars

English Fleiri myndir hér More pictures here Það er óhætt að segja að Self-Transcendence 2 mílna Tjarnarhlaupin hafi verið að sækja í sig veðrið undanfarið.  Í síðustu viku tóku fimm hlauparar þátt, sem er met á þessu ári, og þriðjudaginn síðasta, 8. mars, var þetta met jafnað.  Það er athyglisvert að það voru sömu fimm hlaupararnir sem tóku þátt í bæði skiptin. En þátttökumetið var ekki eina metið sem hreyfðist á þriðjudaginn.  Í síðustu viku hljóp Andrés á 12:27, sem var langbesti tími hans á þessu ári, og þriðjudaginn síðasta gerði hann sér lítið fyrir og sló það met um heilar 26 sekúndur er hann hljóp á 12:01!  Andrés er á mikilli siglingu þessar vikurnar og nú er bara að sjá hvort hann bæti besta tíma sinn frá upphafi, en það er 11:20 sem kom í hlaupinu 14. september. Ágúst Örn kom í öðru sæti á 14:38.  Þetta er 14 sekúndum frá hans allra besta tíma, en sá tími kom einmitt í síðustu viku.  Ágúst hefur hinsvegar allar forsendur til að bæta sinn allra besta tíma og verður spennandi að fylgjast með hvort honum tekst það. Þriðji varð Upajukta á 15:22.  Þetta er 11 sekúndum frá besta tíma hans á þessu ári, 15:11, sem kom 22. febrúar, og nokkuð frá hans allra besta, en það er 14:10 sem kom í hlaupinu 14. september.  Þessi tími var þó bæting um 6 sekúndur frá því í síðustu viku og við vonum að þetta sé allt á réttri leið hjá honum. Víðir kom fjórði í mark á 16:07.  Þetta er besti tími Víðis á árinu, en fyrr átti hann best 16:39 í síðustu viku.  Víðir nálgast nú sinn allra besta tíma, en hann var 15:52 og kom fyrir löngu síðan, eða 12. október.  Nú er bara að bíða og sjá hvort Víði takist ekki að slá þann tíma. Fimmti varð Davíð á 16:58.  Þetta er nokkuð langt frá hans allra besta tíma, en sá tími er 14:00 og kom í hlaupinu 14. september.  Við skulum samt ekki gleyma því að Davíð er nýbyrjaður að hlaupa aftur í Self-Transcendence 2 mílna hlaupunum eftir fjögurra mánaða hlé og þessi tími var þó bæting um 103 sekúndur frá því í síðustu viku, en sá tími var besti tími hans á þessu ári.  Sri Chinmoy hefur margoft sagt að best er að bæta sig hægt og bítandi og það er spá fréttaritara að fyrr en varir verði Davíð kominn með ógurlegan skriðþunga og þá mega Ágúst og Upajukta vara sig. Úrslit: Andrés 12:01 Ágúst Örn 14:38 Upajukta 15:22 Víðir 16:07 Davíð 16:58 Vinsamlegast skoðið fleiri myndir hér Kindly view more pictures here

Þátttökufjöldi hélst stöðugur í Self-Transcendence skemmtiskokki sunnudaginn 6. mars þrátt fyrir að fastagesti vantaði

English

Self-Transcendence skemmtiskokk sunnudaginn 6. mars var haldið í sól og blíðu.  Ágætis þátttaka var, en fjórir tóku þátt sem er metjöfnun frá því að farið var að fylgjast með skokkinu á þessari síðu (áður tóku fjórir þátt sunnudaginn 20. febrúar).  Þátttakan verður að teljast enn betri í ljósi þess það vantaði systurnar Selmu og Kristbjörgu og Rúnar Pál, en þau þrjú hafa alltaf tekið þátt frá því þessi síða hóf að fylgjast með skokkinu.

Í stað fastagestanna þriggja tóku þrjár kjarnakonur þátt, þær Steinunn, Viktoría og Pujarini.  Suballabha var eini fulltrúi strákanna í hópnum, en hann tók einmitt einnig þátt 20. febrúar.

Á dögum sem þessum skartar Laugardalurinn sínu fegursta.  Hreyfingin er nefnilega ekki einasti tilgangurinn með þessu sunnudagsskokki, heldur líka að njóta góðs félagsskapar í fallegu umhverfi, en Sri Chinmoy hefur margoft bent á og hvatt okkur til að eiga svona stundir saman.  Gjörið svo vel og skoðið fáeinar fleiri myndir sem fréttaritari okkar tók hér.

English

Self-Transcendence 2 mílna Tjarnarhlaupið þriðjudaginn 1. mars var hlaupið í blíðskaparveðri; alveg stillt, bjart og mjög fallegt veður. Það var svolítið kalt en þó ekki þannig að það væri hlaupurunum til trafala. Það var líka mjög gaman að geta haldið hlaupið í bærilegri birtu.

Þessar fínu aðstæður skiluðu sér í ýmsum Tjarnarhlaupsmetum, en eins og áður hefur verið getið, leggur Sri Chinmoy mikið upp úr því að menn keppi við sjálfa sig og bæti sig, enda gefur það hlaupinu enn meira gildi.

Fyrst ber að nefna að skipuleggjendur mótsins settu met, þ.e. nýtt þátttökumet á þessu ári.  Fimm hlauparar tóku þátt og þarf að leita allar götur til síðasta hlaupsins á síðasta ári, 30. nóvember, til að finna jafn góða þátttöku.  En metþátttakan í Tjarnarhlaupunum frá upphafi stendur enn, en það eru átta þátttakendur, sem sett var 14. september og jafnað 12. október.

Tveir fyrstu hlaupararnir settu personuleg met:
Andrés kom fyrstur á 12:27 sem er hans besti tími á árinu.  Áður átti hann best 13:10 á þessu ári, en sá tími kom 18. janúar.  Andrés hefur ekki hlaupið jafn hratt síðan 26. október, en þá hljóp hann á 12:16.

Í öðru sæti varð Ágúst á 14:24 sem er hans besti tími frá upphafi og óskum við honum til hamingju með það!!!  Fyrr átti hann best 14:38 og kom sá tími í hlaupinu 7. september, þannig að þessi framför hans var búin að liggja lengi í loftinu.

Þriðji var Upajukta á 15:28 og voru skref hans þung.

Víðir kom óvænt í fjórða sæti en hann kláraði á 16:39 þrátt fyrir að hafa ekki byrjað hlaupið, og er það okkur enn ráðgáta hvernig þetta atvikaðist. Tími hans er því settur innan sviga meðan málið er í rannsókn.

Restina rak svo Davíð massi sem lagði meira upp úr skriðþunganum en hraðanum. Hann skilaði sér á 18:41 eftir að hafa hlaupið fyrri hring á 8:43.

En allir fimm hlaupararnir komu kátir í mark og er óhætt að segja að Tjarnarhlaupið horfi fram á bjartari tíma með hækkandi sól, enda hugur í mönnum.

Úrslit (millitími eftir 1 mílu innan sviga):

1.Andrés 12:27 (6:06)
2.Ágúst 14:24 (7:08)
3.Upajukta 15:28 (7:21)
(4.Víðir 16:39 (7:49))
5.Davíð 18:41 (8:43)

Þrír hlauparar hlupu Self-Transcendence 2 mílna Tjarnarhlaup á meðan hrímþoku lagði yfir Reykjavík, þriðjudaginn 22. febrúar

Fleiri myndir More pictures English Minnugir álitshnekksins í síðustu viku þegar fréttaritari þessarar síðu tók einn þátt í Self-Transcendence 2 mílna Tjarnarhlaupinu, mættu þrír hlauparar úr Sri Chinmoy maraþonliðinu ákveðnir til leiks þriðjudaginn 22. febrúar og létu ekki smámuni eins og hrímþoku stöðva sig.  Enda var þokan lítil fyrirstaða fyrir kraftakarla sem hafa hlaupið í svelli, meira svelli og fannfergi. Hlaupararnir virtust frískir, en eitt besta dæmið um það er að Upajukta tók gríðarlegan endasprett og, með því að bókstaflega stökkva yfir endalínuna, náði hann Ágústi á tímanum 15:11. Þetta var auk þess besti tími þeirra beggja í ár.  Upajukta hljóp 43 sek. betur en það sem hann átti áður best í ár (25. janúar).  Þarf að fara aftur til hlaupsins 12. október til að finna betri tíma (14:11). Ágúst hljóp 27 sek. betur en það sem hann átti áður best í ár (1. febrúar) og, rétt eins og hjá Upajukta, þarf að fara aftur til hlaupsins 12. október til að finna betri tíma (14:47). Andrés var, að venju, í sérflokki í hlaupinu og var ekki nema 5 sekúndum frá besta tíma sínum í ár (18. janúar). Úrslit: Andrés 13:15 Ágúst 15:11 Upajukta 15:11 Skoðið fleiri myndir hér

Til þess að bjarga Self-Transcendence 2 mílna Tjarnarhlaupinu frá þeirri hneisu að falla niður gekk fréttaritarinn Suren 2 mílur, þriðjudag 15. febrúar

Einungis tveir hlauparar tóku þátt í Self-Transcendence 2 mílna Tjarnarhlaupi þriðjudaginn síðasta, 8. febrúar.

English version

Það var kalt og hált við Tjörnina þriðjudagskvöldið síðasta, 8. janúar, þegar sautjánda Self-Transcendence Tjarnarhlaupið fór fram.  Veðrið var nokkurs konar samblanda af fannferginu 16. nóvember og svellinu 30. nóvember.

Aðeins tveir hlauparar létu sjá sig að þessu sinni og börðust hetjulega við náttúruöflin.  Náttúran lætur þó ekki að sér hæða og varð Andrés t.a.m. fyrir því að renna á hausinn.  Hann lét það þó ekki á sig fá, stóð upp og kláraði hlaupið með sóma, minnugur hvatningarorða Sri Chinmoys þess efnis að gefast ekki upp.

En vitaskuld eiga báðir hlauparar hrós skilið fyrir það eitt að vera með undir þessum kringumstæðum.

Engin met voru slegin að þessu sinni, enda væri slíkt aðeins á færi ofurmenna.

Úrslit:

1. Andrés 13:46
2. Upajukta 16:30

Aðeins tveir hlauparar tóku þátt í Self-Transcendence Tjarnarhlaupi þriðjudaginn 1. febrúar

nglish version

Annar af tveimur hlaupurum sem hlupu Self-Transcendence 2 mílna Tjarnarhlaup þriðjudaginn 1. febrúar var Ágúst Örn, en þetta var fyrsta Tjarnarhlaup hans í ár.

Voru það fagnaðarfundir að fá Ágúst aftur í hlaupin, en ljúfmennska hans smitar ávallt út frá sér.  Ágúst fer eftir þeirri heimspeki Sri Chinmoys að einblína ekki á úrslitin heldur vera með og sýna einingu sína í verki.  Ágúst er því ávallt afar velkominn í Self-Transcendence 2 mílna hlaupin.

Tími Ágústs var 15:38, sem er sex sekúndum betri en í síðasta hlaupi hans, 30. nóvember, en nákvæmlega heilli mínútu verri en besti tími hans, sem kom 7. september.

Ágúst gat því ekki veitt Rúnari Páli mikla keppni, en Rúnar fann fyrir eymslum í baki og var sjö sekúndum hægari en fyrir viku.  Rúnari hefur enn ekki tekist að komast undir 14 mínútur í ár, en þar á hann svo sannarlega heima.

Úrslit:

1. Rúnar Páll 14:16
2. Ágúst Örn 15:38

Annað Self-Transcendence Tjarnarhlaup ársins 2005 fór fram þriðjudaginn síðasta, 25. janúar. Þrír hlauparar tóku þátt

English version Þrátt fyrir miklar leysingar síðustu daga er enn nokkuð svell í Hljómskálagarðinum.  Þessu fengu hlaupararnir þrír sem hlupu Self-Transcendence 2 mílna Tjarnarhlaupið síðasta þriðjudag, 25. janúar, að kynnast. Óvenju slæmir tímar litu dagsins ljós að þessu sinni og voru hlaupararnir á einu máli um að ekki væri einungis svellinu um að kenna, heldur spilaði óheilbrigt jólafæði inn í. Það má raunar ekki gleyma því í allri þessari umræðu að hér er um hlaup í janúar að ræða - öðrum af tveimur verstu vetrarmánuðum ársins - og að aðstæður eru sannarlega ekki alltaf eins og best er á kosið. En það einkennir liðsmenn Sri Chinmoy maraþonliðsins, sem innblásnir eru af hvatningu og kenningum Sri Chinmoys, að þeir neita að leita afsökunar í ytri aðstæðum, heldur kafa djúpt inn á við, finna þann styrk sem þar býr og reyna sitt besta að bæta sig, þrátt fyrir allt. Það kæmi því ekki algjörlega á óvart ef einhverjum hlauparanum tækist að setja persónulegt met í janúar eða febrúar - þó að það sé vart líklegt. Ein athyglisverð staðreynd: Tími Rúnars Páls var nákvæmlega sá sami og í hlaupinu 2. nóvember. Úrslit: Rúnar Páll 14:09 Upajukta 15:54 Ganagane 20:18

English version

Skammdegi og votviðri hafði ekki áhrif á hlauparana þrjá sem tóku þátt í Self-Transcendence 2 mílna Tjarnarhlaupinu þriðjudagskvöldið síðasta, 2. nóvember.

Andrés Ramón sigraði örugglega á tímanum 12:32, en athyglisverðastur er tími Rúnars Páls Gígja, sem hljóp á 14:09.  Rúnar heldur stöðugt áfram að bæta sig; hann átti áður best 14:21, sett í hlaupinu 12.október, og þar áður átti hann best 15:25.

Það sem er einkar athyglisvert í þessu er að Rúnar heldur áfram að bæta sig þrátt fyrir að vetur færist yfir og aðstæður haldi áfram að versna.  Það má því segja að Rúnar sé lifandi dæmi um það að keppa við sjálfan sig og bæta sig, en það er stór þáttur í heimspeki Sri Chinmoys.

Úrslit (millitími eftir 1 mílu sýndur innan sviga):

1. Andrés Ramón 12:32 (6:14)
2. Rúnar Páll Gígja 14:09 (6:50)
3. Víðir Sigurðsson 16:47 (8:03)