Fimm hlauparar sigruðust á svelli og kulda í Self-Transcendence Tjarnarhlaupi 30. nóvember

English version Það var hált og svalt þriðjudaginn 30. nóvember, þegar 2 mílna Self-Transcendence Tjarnarhlaupið fór fram í 14 sinn, en hlaup þessi hófust 10. ágúst og hafa haldist gangandi sleitulaust síðan þá, ef undan eru skildar tvær vikur í ágúst. Þeir fimm hlauparar sem tóku þátt að þessu sinni, létu þó ekki aðstæður á sig fá, frekar en þeir hafa gert síðustu tvo mánuði eða svo, eða allt frá því að Kári og Vetur konungur vöknuðu til lífsins hér á Fróni. Fremstan ber að telja þann hlaupara sem síðastur kom í mark, Ganagane Stefánsson, skipuleggjanda hlaupanna.  Þetta er aðeins í annað sinn sem Ganagane hefur haft tækifæri til að hlaupa sjálfur, hitt skiptið var 21. september, og, þegar aðstæður eru einnig teknar með í reikninginn, má hann vera fullsæmdur af tíma sínum, 18:26. Rúnar Páll Gígja hefur verið mikið í fréttunum á þessari síðu fyrir stöðuga bætingu á tíma sínum þrátt fyrir erfiðar aðstæður.  Rúnar olli aðdáendum sínum ekki vonbrigðum og bætti sig um fimm sekúndur frá því í hlaupinu 9. nóvember; hljóp núna á 13:34. Þessi góði tími dugði Rúnari aðeins til annars sætis, því Andrés Ramón hefur snúið til Tjarnarhlaupanna á nýjan leik og, rétt eins og í síðustu viku, sýndi að Rúnar á enn eftir ýmislegt ólært áður en hann getur látið sig dreyma um að ná Andrési.  Tími Andrésar var 13:11, en þetta er þó minnsta bil sem hefur verið milli hans og Rúnars.  Það verður því spennandi að fylgjast með þeim tveimur í framtíðinni. Víðir Sigurðsson og Ágúst Örn Márusson tóku einnig þátt í þessu hlaupi.  Þeir voru mitt á milli forystusauðanna og Ganagane, en sýndu í verki heimspeki Sri Chinmoys að maður verður að byrja hér og nú og vinna með þá getu sem maður hefur einmitt núna ef maður lætur sig dreyma um að bæta sig.  Það er ekki hægt að ætlast til þess að maður stökkvi inn á sviðið sem fullskapaður hlaupari. Úrslit (millitími eftir 1 mílu sýndur innan sviga): Andrés Ramón 13:11 (6:20) Rúnar Páll Gígja 13:34 (6:34) Ágúst Örn Márusson 15:44 (7:37) Víðir Sigurðsson 16:27 (8:00) Ganagane Stefánsson 18:26 (8:52)

Andrés Ramón sneri aftur í Self-Transcendence 2 mílna Tjarnarhlaupið þriðjudaginn 23. nóvember og vann sigur í leysingunum

English version

Andrés Ramón vann öruggan sigur í Self-Transcendence 2 mílna Tjarnarhlaupinu þriðjudaginn síðasta, 23. nóvember.  Andrés hljóp á 12 mínútum og 41 sekúndu og var 1:15 á undan næsta manni.  Andrés hafði ekki tekið þátt í tvö síðustu skipti, en minnti á sig sem um munaði í þetta sinn.  Þetta er samt nokkuð frá hans besta tíma, 11:20, sem hann setti í hlaupinu 14. september.

Annars voru miklar leysingar í allan dag sem skapaði polla og hálku á víð og dreif um brautina.  Olli þetta hlaupurum nokkrum vandræðum.  Rúnari Páli Gígja tókst ekki að bæta tíma sinn og vill hinn sístækkandi aðdáendaklúbbur hans kenna aðstæðum um, en Rúnar hefur tekið nánast línulegum framförum síðan í hlaupinu 12. október.  Tími hans, 13:56, er þó velsæmilegur fyrir þennan tíma ársins og er aðeins 17 sekúndum frá besta tíma hans, sem hann setti í hlaupinu 9. nóvember.  En Rúnar er ekki fyllilega ánægður nema hann nái að bæta tíma sinn í hverju hlaupi, enda hefur hann orðið fyrir miklum áhrifum af skrifum Sri Chinmoys um eigin framfarir (self-transcendence).

Ágúst Örn Márusson varð þriðji á tímanum 15:30.  Ágúst er kominn í ný hlaupaföt, en honum, líkt og öllum öðrum fyrir utan Rúnar Pál, hefur ekki tekist að gera atlögu að besta tíma sínum yfir vetrarmánuðina.  Besti tími Ágústs, 14:38, kom í hlaupinu 7. september.

Um mitt hlaup gægðist tunglið fram úr skýjunum og varpaði ljóma sínum yfir borgina.  Ljósmyndari reyndi að fanga fegurðina, en það verða aðrir að dæma um hvernig til tókst.

Úrslit (millitími eftir 1 mílu sýndur innan sviga):

1. Andrés Ramón 12:41 (6:15)
2. Rúnar Páll Gígja 13:56 (6:37)
3. Ágúst Örn Márusson 15:30 (7:15)

Hin vikulegu Tjarnarhlaup halda áfram þrátt fyrir skammdegi og vetrarveður. Þann 26. október tóku fimm þátt

English version

Fimm tóku þátt í Self-Transcendence 2 mílna Tjarnarhlaupi þriðjudaginn síðasta, 26. október.  Allir kláruðu vegalengdina, sem er afrek út af fyrir sig, þar sem myrkur, kuldi og hvassviðri gera mönnum erfitt fyrir.

Einn erfiðleikaþátturinn bættist við í gærkvöldi, en það er bílaumferðin.  Þó að það sé aðeins á þremur stöðum sem hlaupararnir þurfa að fara yfir götu var í myrkrinu nánast búið að keyra niður fremsta mann, Andrés Ramón.  Andrés lét þetta nú ekki meira á sig fá en svo að hann kom fyrstur í mark á tímanum 12:16, tveimur og hálfri mínútu á undan næsta manni.  Sannkallaður yfirburðasigur hjá honum.

Í öðru sæti varð Rúnar Páll Gígja á tímanum 14:49, en Rúnar Páll hefur tekið einna mestum framförum frá því að Tjarnarhlaupin hófust.

Úrslit (millitími eftir 1 mílu innan sviga):

1. Andrés Ramón 12:16 (6:04)
2. Rúnar Páll Gígja 14:49 (6:59)
3. Davíð Sigurgeirsson 16:26 (7:54)
4. Ágúst Örn Márusson 16:32 (8:06)
5. Víðir Sigurðsson 17:11 (8:21)

Upajukta Ágústsson nýtti sér veikindi og slappleika andstæðinga sinna til að sigra í Tjarnarhlaupi 5. október

English version Þar sem Snatak Matthíasson er enn ekki orðinn nógu hress til að hlaupa og Andrés Ramón ákvað að taka því rólega, var leiðin greið fyrir Upajukta Ágústsson og Davíð Sigurgeirsson að berjast um sigurinn í fyrsta sinn. Ekki reyndist þetta þó verða mikil keppni.  Davíð, sem er vanur að hlaupa í humátt á eftir Upajukta og taka fram úr honum á síðustu stundu, var of fljótur á sér að þessu sinni og sprengdi sig. Upajukta átti því auðveldan dag og sigraði á tímanum 14:56. Annars gerði rok og fimbulkuldi hlaupurunum erfitt fyrir og hlupu margir á sínum versta tíma í haust. Úrslit (millitími eftir 1 mílu sýndur innan sviga): Upajukta Ágústsson 14:56 (7:27) Rúnar Páll Gígja 15:25 (7:05) Davíð Sigurgeirsson 15:46 (7:41) Andrés Ramón 15:50 (7:42) Ágúst Örn Márusson 15:57 (7:52) Víðir Sigurðsson 16:26 (7:56)